ألميدا ينصح لامين جمال: إدارة النجاح أصعب من الوصول ليه
في تصريح مفاجئ وصريح، طلع ماتياس ألميدا، نجم إنتر ميلان السابق، برسالة تحذير موجهة مباشرة لواحد من أبرز مواهب برشلونة حاليًا، لامين جمال والراجل اتكلم بمنتهى الصراحة وقال إن أصعب حاجة ممكن يواجهها جمال مش الشهرة ولا الملاعب، لأ، دي “إدارة النجاح”.
ألميدا قالها كده بالحرف: “النجاح مش سهل، لكن الأصعب منه إنك تفضل ناجح وتعرف تحافظ عليه وأنا عندي 51 سنة، لعبت كورة كتير، وفزت ببطولات، ولعبت كاس عالم، بس في الآخر الكورة بتخلص، والجمهور بينسى” وفعلاً، الكلام ده جاي من واحد عاش كل لحظة في الملاعب وعارف إن الشهرة لحظة، لكن المحافظة عليها محتاجة عقل وهدوء وصبر.
لامين جمال، اللي لسه عمره صغير ولسه في بداية مشواره، بيلعب في نادي كبير زي برشلونة وكل العيون عليه وموهبته واضحة والناس كلها شايفة إنه عنده مستقبل كبير، بس الكلام اللي قاله ألميدا مهم جدًا، خصوصًا في وقت الكل بيغني له وبيمدحه.
ألميدا ختم كلامه بنصيحة من القلب وقال: “دلوقتي هو لازم يستمتع بالكورة، يعيش اللحظة، بس كمان لازم يفكر في اللي جاي ولأن يوم ما هتخلص الكورة، الناس مش هتسأل عنك زي الأول.”
هل لامين جمال هيسمع النصيحة؟ ولا الشهرة السريعة هتخطفه زي ما حصل مع كتير قبله؟ الزمن كفيل بالإجابة، بس اللي متأكدين منه إن كلام ألميدا جاي من قلب خبير شاف كل حاجة.
