لويس فيجو يعلق على تصرف فينيسيوس ويقدم له نصيحه مهمه للجماهير
في ظل الجدل الكبير اللي حاصل حوالين تصرف فينيسيوس جونيور بعد هدفه الملغي ضد أتلتيك بلباو، خرج النجم البرتغالي المعتزل لويس فيجو عن صمته وقال كلمته عن الموقف، بس بطريقه هاديه ومن غير ما يدخل ف تفاصيل كتير.
فيجو قال بصراحه إنه ما شافش اللقطه بعينه، وعلشان كده مش بيحب يعلّق على حاجه هو مش متأكد منها، لكن ف نفس الوقت وضّح رأيه في فكره إن اللاعب يكون على خلاف مع جمهور فريقه.
قال بالحرف: “أنا مش عارف إيه اللي حصل، ومبحبش أتكلم ف حاجه مش شفتها، بس اللي متأكد منه إنك كلاعب لازم تبقى دايمًا قريب من جمهورك، مش بعيد عنهم ولا ضدهم”.
وأكد إن دعم الجمهور هو حاجه أساسيه لأي لاعب، وبيفرق كتير ف مستواه ومستقبله.
فيجو كمل كلامه وقال: “يمكن متهمكش جماهير الفرق التانيه، بس أكيد نفسك جمهورك يحبك ويفتخر بيك، مش كده؟”، وكأنها كانت رساله مباشره لفينيسيوس إنه ياخد باله من تصرفاته ويفكر في تأثيرها على العلاقه بينه وبين جماهير الميرينغي.
واختتم فيجو كلامه بنصيحه واضحه: حاول دايمًا تكسب حب ودعم جمهورك، لإنه السلاح اللي حيخليك تكمل وتنجح، ومفيش لاعب بيقدر يعمل كل حاجه لوحده من غير دعم الناس اللي بتشجعه.
الكل دلوقتي مستني يشوف هل فينيسيوس حيراجع نفسه بعد كلام أسطوره زي فيجو؟ ولا حيفضل ماشي ف نفس الطريق؟
