مبابي ممكن يرجع قدام برشلونه وأنشيلوتي لسه ماحسمش قراره
كشفت صحيفة ماركا الإسبانيه إن النجم الفرنسي كيليان مبابي بيقطع خطوات كويسه ف مشوار التعافي من الإصابه اللي لحقت بيه الفتره اللي فاتت، وفي إحتمال كبير إنه يكون جاهز لموقعة نهائي كاس الملك قدام برشلونه السبت الجاي.
مبابي شارك ف تدريبات الفريق النهارده، وده خلى البعض يتوقع إنه ممكن يظهر ف مواجهة ريال مدريد ضد خيتافي اللي هتتلعب بكرا، لكن المدرب كارلو أنشيلوتي مش ناوي يضغط عليه أو يخاطر بيه قبل مايتأكد مية في المية إنه جاهز.
المدرب الإيطالي لحد دلوقتي ما قالش القرار النهائي بخصوص رجوع مبابي لتشكيلة الريال، وقالت الصحيفه إنه هيعلن عن الموقف النهائي خلال المؤتمر الصحفي اللي هيتم خلال الساعات الجايه.
وكل العيون دلوقتي بتبص نحية المؤتمر ده، خصوصا جماهير ريال مدريد اللي نفسها تشوف نجمهم الكبير راجع يلعب ويدي دفعه قويه للفريق ف وقت مهم جدا من الموسم.
الموسم دخل ف مراحله الأخيره، ومباريات زي نهائي الكأس بتحتاج لكل النجوم ف الفورمه الكامله، ومبابي وجوده ممكن يفرق ف النتيجه والأداء لكن برضو الصحه أهم، وده اللي أنشيلوتي حاطه ف إعتباره.
هنشوف ف الأيام الجايه إذا كان مبابي هيقدر يرجع قدام برشلونه ولا لسه هيتأجل ظهوره شويه.
