كارلو انشيلوتي مرعوب من تدريب البرازيل والسبب كرسي كهربا!
واضح إن مستقبل انشيلوتي مع ريال مدريد قرب يخلص، خصوصا بعد الهزات اللي اتعرضلها الفريق فالفتره الأخيره، واللي خلت الصحافه تبدأ تتكلم عن اسمه كمرشح لتدريب منتخب البرازيل.
صحيفة ماركا الاسبانيه علقت على الموضوع، وقالت بالحرف إن تدريب السيليساو مش مهمه سهله خالص، وشبهت الكرسي اللي هيقعد عليه انشيلوتي بـ”كرسي كهربا”، بسبب الضغط الرهيب اللي بيواجهه أي مدرب للبرازيل من الجماهير و الإعلام اللي مابيغفرش.
يعني مش بس عايزينه يكسب، لأ، لازم يكسب ويبدع ويبهر، ولازم كمان يجيب كاس العالم وكوبا امريكا، غير كده هيبقى مستهدف وهتفتح عليه نار الصحافه المحليه!
ماركا رجعت كمان بالتاريخ وقالت إن من سنة 1958 لحد النهارده، مافيش مدرب درب البرازيل وخرج منها مرتاح، حتى اللي كسبوا كاس العالم.
تيلي سانتانا مثلًا في 82، رغم إن الفريق لعب كوره ممتازه، الناس هاجمته بسبب الخروج، وباريرا كسب المونديال في 94، وبرضه اتهاجم علشان الناس شافت أداء الفريق دفاعي زي الفرق الاوروبيه.
يعني باختصار، البرازيل بلد المجانين كوره، ورضاهم صعب جدا، واللي هيدربهم لازم يكون قلبه حديد، مش بس تكتيك عالي.
هل انشيلوتي هيقدر يستحمل الضغط ده؟ ولا هيرجع يشتاق لأيام بيرنابيو الهادية؟ الأيام جاية وهتقول.
