حجازي ملك منع التسديدات ف تاريخ الاتحاد حسب الإحصائيات الجديده
من بين كل المدافعين اللي مرو على نادي الإتحاد، ييجي أحمد حجازي كأكتر واحد تصدى لتسديدات الخصوم ف موسم واحد، وده حسب الأرقام اللي بقت تتسجل من موسم 2018/2019.
اللاعب المصري، واللي حالياً بيلعب مع نيوم، لسه إسمه بيتررد ف كل إحصائيه دفاعيه قويه للنمور.
أحمد حجازي قدر ف موسم 2020/2021 يمنع 24 تسديده، وده رقم ماحدش قدر يكسره لحد دلوقتي، ورجع تاني ف موسم 2022/2023 وسجل 22 مره منع فيها التسديدات، وده بيأكد إنه كان واحد من أعمدة الفريق الأساسيه وقتها.
وفي الموسم الجاري 2024/2025، دانيلو بيريرا لاعب الإتحاد قدر يوصل لـ21 مره منع فيها التسديدات، ولسه باقي 5 جولات على نهاية الدوري، وده بيفتح الباب قدامه إنه يعدي رقم حجازي لو استمر بنفس الأداء العالي.
اللي متابع مباريات الإتحاد يعرف قد إيه الدفاع مهم ف طريقة لعب الفريق، خصوصاً لما الفريق يمر بظروف صعبه أو يكون في ضغط هجومي عليه وده بيخلي أي رقم زي ده يعتبر إنجاز مش بسيط.
الجمهور الإتحادي دايماً بيفتكر حجازي بكل خير، وبيتمنوله التوفيق مع فريقه الحالي، لكن برضو بيتابع تطور المدافعين الجدد زي دانيلو، واللي ممكن يكون هو حجازي الجديد للفريق ف الفترات الجايه.
