تشيزني في عيون العاصفه.. أخطاءه تهدد حلم برشلونه الأوروبي
في وقت المفروض يكون فيه الفريق بكامل تركيزه قبل ماتش مصيري قدام إنتر ميلان، فجأه بقت كل الأضواء مسلطه على حارس برشلونه فويتشيك تشيزني، والسبب؟ الأداء المتذبذب والأخطاء اللي ماعاد ينفع تتعدّي مرور الكرام.
تشيزني، اللي جاي بخبره كبيره من أرسنال ويوفنتوس، لسه مش قادر يثبت نفسه قدام جماهير الكامب نو وخلال آخر 5 مباريات، الفريق دخل فيه 11 هدف، وكتير منها بسبب أخطاء مباشره من الحارس البولندي، سواء في التمركز أو التعامل مع العرضيات والكرات الثابته.
اللي زاد الطين بله إن أغلب الأخطاء جت في لحظات حساسه
قدام دورتموند، تسبب في بلنتي، وكمان غلط في كوره ركنيه جاب منها الفريق الألماني هدف.
في ذهاب إنتر، ماكانش واثق في نفسه في الكرات العاليه، وساب دمفريز يسجل مرتين وكأنه بيتفرّج وحتى في نهائي الكاس ضد ريال مدريد، الكل شاف تمركزه الغلط في فاول مبابي اللي جاب التعادل.
تشيزني عنده 35 سنه، بس لأول مره بيلعب نصف نهائي أبطال أوروبا ضغط كبير، أيوه، بس ده برشلونه، والمستوى ده ماينفعش فيه الأخطاء الساذجه.
الجمهور بقى قلقان، مش بس من إن تشيزني يغلط في ماتش العوده، لكن كمان من فقدان الثقه في خط الدفاع كله بسببه وبرغم إن الدفاع ليه دور، بس الحارس دايمًا بيكون خط الدفاع الأخير، ولو هو نفسه مش ثابت، الفريق كله بيترنّح.
فليك دلوقتي قدامه اختبار صعب. هل يكمّل بثقته في تشيزني؟ ولا يجرب حل بديل؟ اللي أكيد، إن أي خطأ جديد قدّام إنتر ممكن يطير الحلم كله!
