برشلونة بيدور على الأهداف وإنتر عايز يقفلها دفاع في نصف النهائي
الليلة كل العيون هتكون على ملعب “لويس كومبانيس الأولمبي” في برشلونة، والسبب؟ مواجهة نار بين البرسا وإنتر ميلان في ذهاب نصف نهائي دوري أبطال أوروبا والماتش ده شكله هيكون صراع من نوع خاص، صراع بين هجوم نار ودفاع صخر!
برشلونة داخل اللقاء وهو أقوى خط هجوم في البطولة لحد دلوقتي، بـ35 هدف سجلهم خلال مشواره، وده رقم يخوف بصراحة. فريق بيهاجم من كل اتجاه، وكل لاعب تقريبًا ممكن يسجل واللي بيتابعهم عارف إن الفريق بيلعب بروح عالية تحت قيادة فليك اللي جايب معا روح البايرن.
بس على الناحية التانية، إنتر مش سهل خالص الفريق الإيطالي ما استقبلش غير 5 أهداف في البطولة، وده رقم يخلي أي مدرب يغير خطته وهو بيقابلهم الدفاع الإيطالي معروف بالانضباط والصلابة، والنهاردة قدامه تحدي كبير قدام ماكينة أهداف زي برشلونة.
الماتش مش هيكون سهل لأي طرف، برشلونة عايز يخلصها من بدري قبل موقعة الإياب في إيطاليا، خصوصًا إنه عارف إن ملعب إنتر مش هيرحم وأما إنتر، فهدفه الأساسي إنه يخرج بأقل خسائر، ويمكن يخطف هدف على غفلة يقلب بيه الطاولة.
فمين اللي هيكسب الجولة الأولى؟ هجوم البرسا الكاسح، ولا دفاع الإنتر الحديدي؟ الجماهير مستنية ومتحمسة، والماتش واعد بكل حاجة متعة، ضغط، خطط، وأهداف – أو يمكن مفيش أهداف أصلاً!
